خليني أقولك إن مجال الجرافيك ديزاين (Graphic Design),من أفضل المجالات
اللي ممكن تتعلمها و تشتغل بيها و فوق ده كله تحبها كمان .

في المقال ده هحاول ألخص خبرة 5 سنين في المجال وأوصلها ليك
لو عايز تبدأ في الجرافيك ديزاين أو التصميم الجرافيكي أو لو بدأت بالفعل و لسه تايه.

اقرأ ايضاً: 10 نصائح من كتاب سيكولوجية المال لتحقيق الثراء

اقرأ ايضاً: ما هي خطوات البحث العلمي؟

 دليلك في الجرافيك ديزاين

مبدئياً مجال التصميم واسع و متفرع لأكتر من تخصص،
خليني أقولك إن أحسن طريق ممكن تمشي فيه هو إنك تبدأ (تجرب) كل الطرق
والأكيد إنك مش هتبذل مجهود خرافي ف ده,انت بس هتجرب تمشي (خطوة) ف كل اتجاه
بس قبل م تمشي لازم تاخد معاك حاجة تسندك ف الطريق ( الأدوات الأساسية أو برامج التصميم ).

 هل الجرافيك ديزاين سهل؟ 

قبل م نوضح أكتر في نقطة مهمة جداً جداً لأقصي درجة
واحد دلوقتي هيقولي يا عم صباح الفل موضوع الجرافيك ديزاين ده سهل جدااااا,هحمل (كانفا)
وهتفرج علي فيديو كيف تصبح مصمم جرافيك محترف في 30 ثانية بدون مجهود و خلصت.

طيب نرد بعقلانية و بدون تريقة: بص يا صديقي, (كانفا) وأمثاله مش هيوصلك لتنفيذ شغل (إحترافي)
أو إنك تشتغل في شركة أو تتعامل و تنتج مشاريع حقيقية في التخصص اللي انت فيه,
مجرد تصميمات ع السريع كده,بتهنئ حد بمناسبة عيد.. زواج .. حاجات كليشيه يعني
ف آه هيساعدك تنجز لأن وقتها أصلاً مش مطلوب منك حاجة إحترافية، بس لو ف يوم من الأيام
بتتكلم مع مصمم محترف أو شركة,لو سألوك إيه هي برامج التصميم اللي بتتقنها (أنصحك) بلاش تجيب سيرة كانفا
أو ما علي شاكلته، لأن كده وضعك مش هيكون ظريف و هتبقي بعدت كل البعد عن الإحترافية
و فقدت فرصة شغل.
حط ف دماغك إن ده مجال كبير و فيه علم لازم تتعلمه كويس علشان تقدر تحترفه
و يبقي ده شغلك و مصدر رزق ليك .. اللي بيجي سهل بيروح سهل.

اقرأ ايضاً: أفضل كورس كانفا canva لتصميم من الصفر للاحتراف

كيف أبدأ في مجال الجرافيك؟

نقطة كمان مهمة.. انت مش محتاج أكتر جهاز كمبيوتر أو لاب توب خرافي بإمكانيات ضخمة علشان تبدأ المجال,
مشي حالك باللي متاح معاك و حط ف دماغك إن مفيش حد بدأ كبير و كل حاجة ف خياله متوفرة ليه,سواء الأدوات
أو مستوي الشغل. 

وبلاش بالله عليك تمشي ورا الناس اللي بتقولك انت مش محتاج غير موبايلك
بس عشان تحترف المجال و تكسب, هات أي كمبيوتر أو لاب توب علي قد إمكانياتك
حتي لو هيشغل البرامج الأساسية بس.

- تمام يعني أروح دلوقتي حالا أدفع آلافات و اشترك في كل كورسات برامج التصميم؟؟

= لأ طبعا محدش قال كده.. المصادر المجانية مفيش أكتر منها دلوقتي و خصوصا الكنز اللي اسمه (يوتيوب).

و برضو لازم تفهم إن دي مجرد (بداية) .. لما تتعمق و تختار مجال معين تقرر إنك
هتكمل فيه و هتتخصص فيه، وقتها هيبقي في مصادر كتير جداً مدفوعة فيها معلومة
مستحيل تبقي موجودة ف المصادر المجانية, و هنا خلينا ننبه إن لازم تشتغل علي لغتك الإنجليزية شوية,
لأن هتفتحلك أبواب كتير للتعلم و للشغل و لمستوي العملاء اللي بتتعامل معاهم.

اقرأ ايضاً: افضل طريقة لتعلم اللغة الانجليزية

ماذا يدرس طالب الجرافيك ديزاين؟ 

 في البداية انت عندك (Check Points) اللي هما:

1-  تحديد المجال اللي انت بتحبه و نفسك تكمل و تتخصص فيه.

2- تحديد الأدوات و البرامج اللي هتساعدك في المجال ده فقط, و لو زودت زود برامج ممكن تخدمك بشكل أو بآخر.

3- تعلم أساسيات البرامج اللي اخترتها و التطبيق عليها، بعدين تعلم البرامج بشكل أعمق و التطبيق علي مشاريع حقيقية.

4- إنشاء معرض أعمال لشغلك اللي بيوضح مستواك الحالي حتي لو الشغل ده مش لعميل حقيقي علي أرض الواقع.

5- عرض شغلك بشكل مستمر و التقديم علي وظائف تخص المجال بتاعك.

 ما هي المهارات والخبرات اللازمة لتكون مصمم جرافيك ديزاين؟

- أيوه يعني أعمل إيه !؟

مبدئياً بص يا سيدي... عارف دراعك اليمين؟
هنا اسمه الحقيقي (Adobe Photoshop) ده بقي مستحيل تلاقي أي تخصص
هو ملوش دخل فيه بشكل أو بآخر. 

اقرأ ايضاً: كيفية تعلم الفوتوشوب من الصفر الي الاحتراف (مسار كامل لتعلم الفوتوشوب )

هستأذنك تتعلم أساسيته الأول و نرجع نتكلم, هسيبلك Playlist  لواحد من أفضل الناس في المجال (نور ديزاين)
اللي بالمناسبة هتلاقي ف قناته بعض الفيديوهات اللي بتشرح الجانب الأكاديمي للتصميم و بعض النظريات المهمة.

هتلاقي كورس فوتوشوب كامل للمبتدئين نور اكاديمي من هنا

 طيب أنا اتعلمت أساسيات فوتوشوب ماذا بعد؟
دلوقتي انت محتاج تعرف إيه هي أصلا (التخصصات) اللي تندرج تحت مجال الجرافيك ديزاين،
و تاخد فكرة عن كل تخصص، و بعد كده تعرف إيه البرامج المطلوبة لكل تخصص و تتعلم أساسيتها كويس أوي
 و (تطبق) عليها، وواحدة واحدة تتعلم بشكل أعمق و تشتغل في المجال اللي انت هتحدده خلال رحلتك في الطريق الممتع ده.

ما هى أقسام الجرافيك ديزاين؟

أهم تخصصات و مجالات تصميم الجرافيك:

• تصميم الشعارات والهوية البصرية (Logo & Brand identity design)
• تصميمات الدعايا والإعلان والمطبوعات والسوشيال ميديا  (Advertising design)
• تصميم الموشن جرافيك (Motion graphics design)
• تصميم واجهات المستخدم للمواقع والتطبيقات (UI/UX Design)
• مجال المونتاج والتعديل علي الفيديو (Montage & Video Editing)
• تصميم الثرى دي  (3D design)
• مجال الرسم ومجال الكونسبت أرت   (Illustration & Concept art)

و ده كمان فيديو بيوضح معلومات عن كل مجال 

 كيف تصبح مصمم جرافيك من الصفر؟

تمام، دلوقتي بقي أنا عايز أعرف مين أحسن ناس و قنوات يوتيوب
 أتابعهم بدل م انزل أدفع الآفات ف كورسات أوفلاين ملهاش لزمة..

افضل قنوات اليوتيوب لتعليم الجرافك ديزاين 

دي قائمة بأفضل شخصيات ممكن تتابعها و تتفرج علي شرحهم
المجاني في مجال الجرافيك ديزاين في أكتر من تخصص:

1-      نور ديزاين: رابط يوتيوب  

2-      محمد خيال: رابط يوتيوب 

3-      مصطفي مكرم: رابط يوتيوب

4-      زياد ستوديو: رابط يوتيوب 

5-      مروان عمرو: رابط يوتيوب 

6-      وسيم قدورة: رابط يوتيوب 

7-      عمرو عطا الله: رابط يوتيوب 

8-      صهيب الدسوقي: رابط يوتيوب 

ضروري تعرف إن الناس دي Active علي كل المنصات
ف انت مش هتستفيد من يوتيوب بس، أنصحك تتابعهم علي كل
منصات السوشيال ميديا.

ضروري كمان تعرف إن كل حاجة بتشوفها و بتتعلمها انت محتاج (تطبق) عليها بإيدك
وإلا كل ده هيتنسي مع الوقت بسهولة.

اقرأ ايضاً: كورسات جرافيك معتمدة graphic design courses

أفضل مواقع التغذية البصرية للمصممين

 دلوقتي بقي وقت أهم نقطتين بالنسبالك كمصمم: (التغذية البصرية + مهارات البحث)
مهم جداً بالنسبالك تخصص ساعة أو ساعتين يوميا في ما يسمي بالتغذية البصرية.

يعني ايه تغذيه بصريه؟

اللي هي ببساطة إنك تتفرج علي شغل مصممين تانيين في المجال اللي انت مهتم
 وناوي تشتغل فيه تتفرج، تحلل، تتناقش مع حد و تنتقد الشغل كمان (قدام شوية)

و علي فكرة مش شرط ده يكون من خلال المواقع أو التطبيقات,
ممكن يكون من خلال الإعلانات في الشوارع أو الطبيعة نفسها.

ما افضل المواقع للتغذية البصرية للمصممين

 أهم المواقع اللي من خلالها تقدر تعمل تغذية بصرية:

1-  Behance 

2- Pinterest 

3-  Instagram

4- Dribbble

ما هي المهارات التي يجب توافرها في مصمم الجرافيك؟

مهارات البحث بقي:

 لازم تكون عارف ازاي تعمل بحث وتوصل للمعلومة الي ناقصاك،
مش مجرد ما تكون محتاج حاجة أو مش عارف حاجة ف تروح تسأل شخص،
انت كدة بطريقة او أخرى بقيت معتمد على الشخص ده في كل حاجة ناقصاك بالتالي مجرد
غيابه بالنسبالك هيبقي مشكلة، ف دور على المعلومة ولو معرفتش توصل ساعتها ممكن
تسأل بس بعد ما تكون عملت الي عليك. لازم هدفك يكون تعدد مصادر معلوماتك علشان
 متعطلش ف نص الطريق، و الزمن اللي احنا عايشينه ملكش حجة بصراحة، مصادر المعلومات ملهاش آخر.

هل مجال تصميم الجرافيك مربح؟

أكيد هيكون في مقال تاني نتكلم فيه  بشكل أعمق عن كل تخصص و كمان عن ال(Freelance) 
أو العمل الحراللي يعتبر من أفضل مميزات المجال و كمان نتكلم عن إزاي تعمل معرض أعمال ليك؟
 منين تجيب Stocks تساعدك في التصميم بتاعك؟
و إزاي توصل لعملاء حقيقيين؟ و إيه أفضل طريقة للتواصل معاهم؟
الذكاء الإصطناعي أخباره إيه و تأثيره علي المجال واصل لحد فين؟
و برضو هنقول إيه أفضل المصادر المدفوعة اللي لو حابب تتعمق في تخصص معين ممكن تتابعها

اقرأ ايضاً: اقوي كورس فري لانسر مجاناً كيف تعمل علي الانترنت خطوة بخطوة

الطريق مش سهل ومش صعب الموضوع عايز منك (إستمرارية) فقط لا غير,
إوعى تبطل تطوير من نفسك لأن لو معملتش كده هتفضل واقف مكانك وفي شخص مجتهد أكتر منك هيعديك بسهولة.

لو عرفت تخلي في Mentor ليك أو شخص بيوجهك في البداية هيكون كويس جداً.
خليك فاكر إنك مطالب بالسعي مش النتيجة ف إسعى واعمل اللي عليك والنتيجة مش بتاعتك خالص.

لو وصلت لحد هنا فده شئ مبشر إنك عندك صبر وطولة بال و إن شاء الله هيجي منك كل خير،
و لو استفدت أي حاجة إدعيلي دعوة حلوة.

ما كان من توفيق فمن الله وما كان من خطأ أو نسيان فمني و من الشيطان.